حسين الحارثي ومحمد بن رشيد

[محمد ابن صاهد]

حسين الحارثي

ارتاح ياصاحبي هاني وقرب يابن زراق
نبي نسوق المطيه لين تاصل منتهاهـا
الظاهر انك على قول المثل مزاح سراق
من دون هقواتنا منته بجاين من وراها

محمد بن رشيد
ارتاح ياصاحبي هاني وخل القاف ينسـاق
واللي يدور على حاجـه ليـا دور لقاهـا
الليله انته وراك اتصير شين اطبوع واخلاق
حتى مع اللي رفيع ٍ يالحسيكـي مستواهـا

حسين الحارثي
اركد وحذرا تلخبط يامحمد بعض الاوراق
ترا الملفات واجد ودنا نـدرس حداهـا
لاتحسد الناس والله جل شانه خير رزاق
قضيتك وجههاياصاحبي يشبـه قفاهـا


محمد بن رشيد
انته تبا افراق مير افراق ماحاصل لك افـراق
ياللـي تسـوق المطيـه قيدهـا قطـع يداهـا
انت ابدوي راس مالك خمس ضان وكثرها انياق
ومن شح الايام صرت احيـان ماتلقـا عشاهـا


حسين الحارثي
انا مادور على الفرقا تراني رجل صـداق
افرح لياشفت قوم اليا إغلطت تعدل خَطاها
عِلمٍ يلم العرب على الوفا روحوا له اسباق
ترا العرب شرها يكبر لياشقرت عصاهـا


محمد بن رشيد
اثر عيونك تخيل يالحسيكـي كـل بـراق
مالك ومال البروق اللي تلامع في سماهـا
وادي جلال المسمى يجتمع مع واد الاشواق
والناس في تالي الايام من يدرك رضاهـا


حسين الحارثي
اخيلها من محبتها ماهي من حقد وإنفاق
وازعل ليا شحت وكفت من اذنوبك بماها
من طاوع اللي تمسى ساق فالدنيا سملاّق
بلش وكحل عيونه والكحل سبب عماهـا


محمد بن رشيد
الارض ياصاحبي شيطانها من نومته فـاق
واصبح صدور الرجال المغلقه يبحث خفاها
عسى يمين ٍ تقدم شر لاهل الطيب تنعـاق
والناس تاريخها اللي تكتبه يشهـد علاهـا


حسين الحارثي
من لاتحمل وضحى ماتجمل ينحسـب عـاق
لابوه وامـه لـو ان الام مايلحـق جزاهـا
ياطيب ضلع الهدا لـولا ملفاتـه والانفـاق
من سار معها وهو مسرع مايسلم من حصاها


محمد بن رشيد
العين شافت وعافت ماحصل والصدر ماضاق
واللي نباها خلـف نايـف خويـك مايباهـا
مير انتبه قبل اقول الموس فوق الروس حلاق
والعله الخافيـه والمزمنـه عنـدي دواهـا