سلطان المنصوري وحسين الحسيكي

[حســين الحارثي]

هذه محاوره جرت بيني وبين الشاعر / سلطان المنصوري الثبيتي الذي انظم الى منتديات وصوتية شعراء الميدان مؤخراً وقد كانت في يوم الجمعه ليلة السبت الموافق 3/4/1428هـــ


[حسين الحارثي] =
مرحبا ترحيبةٍ برقها يلمع لميع=بعد شرف شاعر اثبيت فالميدانيه

انت تاجر تشتري والا يالتاجر تبيع=وحده لابد يرجح بها الميزانيه

[سلطان المنصوري] =
البقا من هاجسن فى المواقف مايضيع=وانت واحد من شبابه ومن جيرانيه

نشتري ونبيع في صيف ولا في ربيع =عندنا عملة جديدة وعملة ثانية

[حسين الحارثي]=
لايغرك سوق الاسهم ولو كسبه سريع=كم غدى فيها ومنها ياخوك انسانيه

ادري انك رجل عاقل وتحمي كل ريع=مير محدٍ يظمن العمر والازمانيه

[سلطان المنصوري]=
سوق الاسهم مادخلناه يالقلب الشجيع =شغلنا معروف في سويسرا والمانية

مايضيق الوقت لاحصل الصدر الوسيع=البلى ياحسين في العود ابو دخانية

[حسين الحارثي]=
ساحة الاحداث كم راح فيها من فضيع=وانت من مكه لجده ليا عسفانيه

الفديع اللي غدى ماطلع بعده فديع=لو تقل قحطان موجود في قحطانيه

[سلطان المنصوري] =
ساحة الاحداث تثر على الطفل الرضيع=مار ماتثر على فارس الفرسانية

الوداعة يالحسيكي مجودها الوديع=وش يهد البنية اللي على سيسانية

[حسين الحارثي] =
طيع شور اللي يودك وينصح فيك طيع=لاتهور نخسرك واللعن الشيطانيه

قيل فالامثال والناس تسمع به جميع=ويش بعد النار يا اصحابي العتبانيه

[سلطان المنصوري]=
كيف اطيعك وانت مالك جميل ولا صنيع=ماغزيت مطير مثلي ولا قحطانية

دام نار العز حية وحلم الله وسيع=ماعلينا منك يالطير ابو جنحانية